اليابان تعلن رسمياً يوم 9 سبتمبر للاحتفال بأنمي هجوم العمالقة

هواية مرات نمر بأعمال فنية ونتابع قصص، بس قليل منها اللي يترك أثر حقيقي ويخلينا نرجع نتذكر تفاصيله بحنين. قصة “Attack on Titan” مو مجرد مانغا أو أنمي شفناه وخلص، بل هي رحلة عشناها على مدار سنين بشخصياتها المعقدة ومآسيها اللي خلتنا نصفن هواية بعد كل حلقة. ورغم أن القصة انتهت، إلا أن تأثيرها بعده مستمر، واليوم اليابان قررت تنطي هذا العمل حقه وتخلده بشكل رسمي.

9 سبتمبر.. تاريخ ينحفر بذاكرة اليابان

رسمياً، اعترفت جمعية الذكرى السنوية اليابانية بيوم 9 سبتمبر ليكون “Attack on Titan Day”. هذا التاريخ مو عشوائي أبداً، بل هو نفس اليوم اللي صدرت بيه المانغا لأول مرة بمجلة “Bessatsu Shonen Magazine” سنة 2009. يعني من اليوم ورايح، صار عدنا يوم مخصص كل سنة حتى نستذكر بيه إبداع “هاجيمي إيساياما” والرحلة اللي عشناها وية إيرين، ميكاسا، وأرمين.

شلون راح يتم الاحتفال بهذا اليوم؟

شركة “Kodansha” الناشرة للعمل ما فوتت هاي المناسبة زين، وحضرت شوية فعاليات لطيفة لكل شخص بعده متعلق بهذا العالم:

• فصول مجانية: منصة المانغا الرقمية “Magazine Pocket” راح توفر أول 99 فصل من المانغا للقراءة بشكل مجاني تماماً، ولمدة 99 ساعة تبدأ من منتصف ليل 9 سبتمبر. فرصة كلش حلوة للي يحب يرجع يقرأ البدايات.
• بث مباشر خاص: راح يتم تنظيم بث مباشر يجمع مؤدي الأصوات اليابانيين لشخصيات (إيرين)، (ميكاسا)، و(كوني)، حتى يشاركون ذكرياتهم وية المتابعين.

موسيقى حية واعترافات صادقة من “إيساياما”

نجاح “Attack on Titan” ما چان بس بالقصة أو الرسم اللي تألق بيه استوديو “Wit Studio” ومن بعده استوديو “MAPPA” (اللي ديحتفل حالياً بمرور 15 سنة على تأسيسه)، بل الموسيقى چانت روح العمل. ولهذا السبب، تم التأكيد على انطلاق جولة عالمية لأوركسترا العمل تبدأ في أكتوبر 2026 وتستمر حتى 2027 لتشمل مدن حول العالم.

هل كانت النهاية “غير مكتملة”؟

ورغم كل هذا النجاح والمبيعات اللي تجاوزت 140 مليون نسخة، “هاجيمي إيساياما” فاجأنا بتصريح أخير يتسم بشفافية عالية. إيساياما وصف نهاية سلسلته بأنها “غير مثالية”، واعترف أن جزء چبير من هذا الشيء يرجع لقلة نضجه بفترة العشرينيات من عمره.

إيساياما گال إنه ما گدر يلتزم تماماً بإظهار (إيرين) كشخصية مكروهة بالكامل، ووجد نفسه يكتبه بنوع من التعاطف والقرب، وهذا اللي خلاه يحس بوجود عدم إخلاص بتقديم النهاية، حسب تقييمه الشخصي. تصريح يخلينا نفهم شلون الكاتب نفسه ممكن يعيش صراع داخلي وية شخصياته.

وهنا أوجه السؤال إلكم، وبعيداً عن التعصب للآراء: بعد مرور فترة على انتهاء “Attack on Titan” وهدوء العاصفة، هل تتفقون وية إيساياما إن تعاطفه مع (إيرين) أضعف النهاية؟ لو تشوفون إن هذا التعاطف هو بالضبط اللي خلى شخصية إيرين واقعية وإنسانية وتلامس مشاعرنا؟ شاركوني أفكاركم، لأن هذا الموضوع فعلاً يستحق النقاش.